சின்னசேலத்தில் உள்ள தனியார் பொறியியல் கல்லுாரியில் கொரோனா வார்டில் சிகிச்சை பெற்று வருபவர்களை சப் – கலெக்டர் ஸ்ரீகாந்த் ஆய்வு செய்தார்.சின்னசேலம் அடுத்த வாசுதேவனுார் பகுதியில் உள்ள தனியார் பொறியியல் கல்லுாரி, கடந்த சில மாதங்களுக்கு முன்பாக தனிமை படுத்தப்பட்ட வார்டாக மாற்றப்பட்டது. இங்கு அரசு அனுமதியுடன் வெளிமாநிலங்களில் இருந்து சொந்த ஊருக்கு வருபவர்களின் எண்ணிக்கை தொடர்ந்து அதிகரித்துள்ளது.இதையொட்டி மகாராஷ்டிரா, கேரளா உள்ளிட்ட மாநிலங்கள் மற்றும் மஸ்கட், துபாய் போன்ற வெளிநாடுகளிலிருந்து கள்ளக்குறிச்சி பகுதிக்கு வந்த 57 பேருக்கு நடத்தப்பட்ட கொரோனா பரிசோதனையில் தொற்று உறுதியானதால், அவர்களை வாசுதேவனுார் தனியார் பொறியியல் கல்லுாரியில் தனிமை படுத்தப்பட்டு, சிகிச்சை பெற்று வருகின்றனர். நேற்று மகாராஷ்டிரா மாநிலத்தில் இருந்து வந்த 12 பேரின் உமிழ்நீர் மாதிரிகளும் பரிசோதனைக்கு அனுப்பப்பட்டுள்ளது.இதனையடுத்து, கள்ளக்குறிச்சி சப் – கலெக்டர் ஸ்ரீகாந்த், கொரோனா பாதித்த நபர்களை நேற்று பார்வையிட்டு, அவர்களுக்கு தேவையான உணவு, குடிநீர், இருப்பிட வசதி குறித்து அதிகாரிகளிடம் கேட்டறிந்தார். இதில் தாசில்தார் வளர்மதி, சுகாதார அதிகாரிகள் மற்றும் ஊழியர்கள் உடனிருந்தனர்.
