திருக்கோவிலுாரில் கொரோனா அச்சமின்றி குவியும் கூட்டத்தால் தொற்று பரவும் அபாயம் எழுந்துள்ளது.திருக்கோவிலுாரில் துவக்க காலத்தில் கொரோனா பாதிப்பு இல்லாத பசுமை மண்டலமாக இருந்தது. தற்போது திருக்கோவிலுார் கொரோனாவின் ஹாட் ஸ்பாட்டாக மாறி விட்டது. நகரத்தில் மட்டும் 200 பேர் தொற்றுக்கு ஆளாகி இருக்கும் சூழலில், மாவட்டத்திலேயே அதிக உயிரிழப்பு ஏற்பட்ட பகுதியாக 10க்கும் மேற்பட்டோர் இறந்துள்ளனர்.இந்த சூழலில் வியாபாரிகளும், பொதுமக்களும் தாமாக முன் வந்து ஒரு வாரம் முழு அடைப்பு நடத்தினர். இந்நிலையில் நகரத்தில் குறிப்பாக கடை வீதி, வடக்கு வீதிகளில் கூட்டம் அலை மோதுவது வாடிக்கையாகி விட்டது.கூட்டத்தைக் கட்டுப்படுத்த போலீசார் தடுப்புகளை ஏற்படுத்தி இருந்த போதிலும் கண்காணிக்க யாரும் இல்லாததால் வடக்கு வீதியில் நேற்று மதியம் நடந்து செல்வதற்குகூட முடியாத அளவிற்கு கூட்ட நெரிசல் காணப்பட்டது.அதிக நோய் தொற்று, உயிரிழப்பு என மாவட்டத்தில் பெரும் பாதிப்பை சந்தித்திருக்கும் நகரில் கட்டுக்கடங்காத கூட்ட நெரிசலால் மேலும் தொற்று பரவி அபாய கட்டத்திற்கு செல்லும் நிலை உருவாகியுள்ளது.நோயின் தீவிரத்தை கண்கூடாக பார்த்த போதும், விழிப்புணர்வு அடையாத மக்களை ஒழுங்குபடுத்த வேண்டியது அரசின் கடமை. இதற்காக தனி மனித இடைவெளியை பின்பற்றாத கடைகள் மீது நடவடிக்கை, வாகன போக்குவரத்தில் கட்டுப்பாடு, ஒருவழிப் பாதை போன்ற நடவடிக்கைகளை அனைத்து துறை அதிகாரிகளும் இணைந்து உடனடியாக மேற்கொள்ள வேண்டியது அவசியம் ஆகும்.
