கள்ளக்குறிச்சியில் நேற்று முன்தினம் ஒரே நாளில் 134 அரசு பஸ்களில் 1,327 பேர் பயணம் செய்துள்ளனர்.கள்ளக்குறிச்சி அரசு பஸ் பணிமனைகள் மூலம் கொரோனா ஊரடங்கில் இருந்து 68 நாட்களுக்கு பிறகு பஸ் போக்குவரத்துக்கு அனுமதி அளிக்கப்பட்டுள்ளது. இதனால் 2 பணிமனைகளைச் சேர்ந்த 50 டவுன் பஸ்கள், 84 மப்சல் பஸ்கள் என 134 பஸ்கள் நேற்று முன்தினம் முதல் கள்ளக்குறிச்சி, விழுப்புரம், கடலுார், திருவண்ணாமலை ஆகிய 4 மாவட்ட பகுதிகளுக்கு இயக்கப்படுகின்றன.கள்ளக்குறிச்சியில் 2 பணிமனைகளில் மொத்தம் 218 பஸ்கள் இருப்பினும் 50 சதவீத பஸ்கள், 50 சதவீத பயணிகளுடன் மட்டுமே இயக்கப்பட்டு வருகின்றன. அதன்படி கள்ளக்குறிச்சியில் நேற்று முன்தினம் ஒரே நாளில் 1,327 பயணிகள் 134 அரசு பஸ்களில் பயணம் செய்துள்ளனர்.10 ஆயிரத்திற்கும் மேற்பட்டோர் பயணிக்கும் நிலையில், நீண்ட இடைவெளிக்குப்பின் அரசு பஸ்கள் இயக்கப்படும் நிலையில் பயணிகளின் எண்ணிக்கை குறைவாக உள்ளது. இது நாளுக்கு நாள் அதிகரிக்கும் என பணிமனை மேலாளர் விஸ்வநாதன் தெரிவித்தார்.
